Perpetuum mobile etter teikning i eit handskrift frå omkring 1600. Vasshjulet driv ved hjelp av ein snekkeskrue ein loddrett aksel med svinghjul. Ved tannhjulsoverføring til ein vassrett aksel blir det drive ein vasskrue som pumpar vatnet opp. Det blir også vatn til overrisling av slipesteinen, forutan det vatnet som driv vasshjulet. Ideen er naturlegvis umogleg, både som eviggangsmaskin og slipesteinmotor.

.
Lisens: fri

Perpetuum mobile, også kalla eviggangsmaskin (bokmål: evighetsmaskin), er nemning for ei maskin som skulle kunne utføre mekanisk arbeid utan tilførsel av energi.

Faktaboks

Uttale
perpˈetuum mˈobile
Etymologi
latin ‘alltid i rørsle’
Også kjend som

eviggangsmaskin, ævemaskin, evighetsmaskin

Ideen om perpetuum mobile er fleire tusen år gammal, og det finst ei mengde tenkte konstruksjonar heilt fram til i dag. Dei fleste er baserte på å utnytte tyngdekrafta, til dømes med vekter som flyttar seg på eit hjul og får det til å rotere. Andre konstruksjonar er baserte på å utnytte vatn som blir løfta og fell ned igjen, og nokre vil utnytte oppdrifta i vatn. Også magnetiske krefter er tenkt utnytta i kombinasjon med tyngdekrafta.

Energilova, ei viktig slutning ein har komme til ut frå observasjonar og erfaringar om ulike energiformer, seier at energi aldri kan oppstå eller gå til grunne, berre skifte frå ei form til ein annan. Eviggangsmaskina, med sin tenkte gevinst av energi eller arbeid, er altså i strid med energilova. Allereie Leonardo da Vinci og mange etter han var klar over at ei eviggangsmaskin ikkje kan fungere. Og sjølv om ein tenkt sjølvforsynt maskin ikkje leverte noko arbeid, ville ho måtte stanse på grunn av friksjon inne i maskina og friksjon mot lufta.

Typar

Perpetuum mobile av første slag

Perpetuum mobile av første slag er ein mekanisme med effektivitet større enn 100 prosent, det vil seie at mekanismen utfører større arbeid enn energien som blir tilført. Dette inneber at mekanismen skaper energi, noko som ikkje er mogleg ifølge prinsippet om bevaring av energien (den første hovudsetninga i termodynamikken).

Perpetuum mobile av andre slag

Perpetuum mobile av andre slag er ein mekanisme som kan ekstrahere indre energi frå ei kjelde for deretter å forme om denne energien til mekanisk energi. Mekanismen skal kunne verke kontinuerleg i uavgrensa tid.

Eit døme på ein slik mekanisme ville vere eit skip som kunne ekstrahere varme frå havvatnet og bruke denne energien til å drive skipet framover. Så langt kjende forsøk på å konstruere ein slik mekanisme har vore i konflikt med den andre hovudsetninga i termodynamikken.

Konfliktane oppstår når delprosessane i dei aktuelle mekanismane føreset noko som er i strid med den andre hovudsetninga. Det kan vere:

  1. entropisenking utan utveksling av varme (til dømes ved adiabatisk ekspansjon)
  2. at energien strøymer frå eit lågt temperaturnivå til eit høgare temperaturnivå

Begge desse føresetnadene er i strid med den andre hovudsetninga til termodynamikken. Viss ein skal konstruere perpetuum mobile type 2, må ein unngå dei. Ein må konstruere ein mekanisme ved hjelp av delprosessar som ikkje er i konflikt med den andre hovudsetninga.

Perpetuum mobile av tredje slag

Perpetuum mobile av tredje slag er ein mekanisme som kan gå i all æve, utan tilførsel av energi. I motsetning til dei to første typane er det her ikkje noko krav at ein skal ekstrahere energi som kan nyttiggjerast. Mekanismar av dette slaget kunne eksistere dersom ein var i stand til å fjerne all friksjon.

Ein perfekt superleiar er eit perpetuum mobile av tredje slag. I ein perfekt superleiande ring vil straumen kunne halde fram med å gå av seg sjølv utan å minske. Også mikroskopiske atomære og molekylære rørsler, som gir opphav til dømes til brownske rørsler, har karakter av perpetuum mobile av tredje slag. Slike rørsler kan likevel ikkje nyttast til å ekstrahere energi som kan utnyttast.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg