Parkslirekne er ei fleirårig urt i slireknefamilien. Planten er 1–2 meter høg med grove, opprette stenglar. Blada er store, 10 centimeter lange eller meir, lêrharde med tverr bladgrunn og utdregen spiss. Blomane er små og grønkvite. Planten, som stammar frå Aust-Asia, er einkjønna og set sjeldan modne frø i Europa. Han formeirar seg i staden med kraftige jordstenglar, opptil 5 centimeter tjukke og 20 meter lange.
Faktaboks
- Vitskapeleg namn
- Reynoutria japonica
- Beskriven av
- Maarten Houttuyn
- Framandartstatus i Noreg
- SE – Svært høy risiko
Parkslirekne vart innført til Noreg som prydplante, men har mange stader kome ut av kontroll og spreier seg no sterkt i strand- og skogkantar, langs vegar og elles på udyrka mark. Han er nokså vanleg i Sør-Noreg, meir sjeldan i kyststroka vidare nordover til Lofoten og Vesterålen. Planten er vanskeleg å få bukt med, spesielt om ein berre bruker mekaniske metodar. Best resultat blir oppnådd med ein kombinasjon av mekaniske tiltak, til dømes slått, etterfølgd av kjemiske tiltak (glyfosat) på gjenveksten.
Planten er oppført på IUCNs liste over dei hundre verste invaderande artane i verda. Han fekk kategori «svært høg risiko» på framandartslista (Norsk svarteliste) i 2012.
Kommentarar (2)
skreiv Sverre Olav Lundal
svarte Unni Vik
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.