generalist (biologi)

Generalist er ein art som utnyttar eit breitt spektrum av ressursar (føde, tilhaldsstad med meir), i motsetnad til ein spesialist.

Generalistar har breie økologiske nisjar. Dei har gjerne vid utbreiing, og føde og levevis kan variere mykje frå stad til stad. Generalistar vil også ha større høve til å tilpasse seg habitat som er påverka av menneske, samanlikna med spesialistar.

Til dømes er rev ein typisk generalistpredator som et mange ulike pattedyr, i tillegg til åtsel og avfall. Andre kjende generalistar i norsk natur er løvetann, kråke og torsk. Parasittar som er i stand til å parasittere mange ulike vertar, blir også definerte som generalistar.

Dei fleste artar er korkje ekstreme generalistar eller ekstreme spesialistar, men ligg ein stad mellom desse to ytterpunkta.