Tove Bull

Tove Bull er cand.philol. sidan 1972 frå Universitetet i Trondheim (no NTNU) med nordisk hovudfag. Ho var tilsett ved Tromsø lærarhøgskule i 1973–1984, først som lektor, frå 1983 som førsteamanuensis. Ho vart førsteamanuensis i nordisk språkvitskap ved Universitetet i Tromsø i 1984–1990 og professor frå 1990. Bull var prorektor ved Universitetet i Tromsø i 1990–1995 og rektor same staden i 1996–2001.

Bull sitt vitskaplege virke har særleg dreidd seg om lese- og skriveopplæring, nordnorsk dialektologi, språksosiologi og språkkontakt. Viktige arbeid er antologien Nordnorsk. Språkarv og språkforhold i Nord-Noreg (redigert saman med Kjellaug Jetne, 1982) og monografien Lesing og barns talemål (1985), og sistnemnde rapporterer frå Bull sitt prosjekt med lese- og skriveopplæring på dialekt i byrjinga av 1980-åra.

I ei rekkje artiklar om dialektar og språkforhold i Nord-Noreg har Bull særleg vektlagt språkkontakten mellom norsk og samisk. Ho har mellom anna vist korleis den spesielle språkkontaktsituasjonen som ein del nordnorske dialektar har vakse fram, kan forklare systematiske trekk i lydsystemet (fonologien).

I språkdebatten har Bull markert seg som ein talsperson for nynorsk, og i 1981–1987 var ho styremedlem i Noregs Mållag. Ho har elles hatt ei lang rekkje faglege og administrative verv. Ho var medlem av Norsk språkråd i 1980–1995, der ho sat i fagnemnda i 1983–1988 og var leiar av nynorskseksjonen i 1988–1995. Ho var medlem av Det norske universitetsrådet frå 1990 og leiar der frå 1999. Medlem av Universitets- og høgskuleutvalet i 1992–1993, av Ytringsfrihetskommisjonen i 1996–1999 og medlem av styret for NRK frå 1999.

Bull fekk saman med Toril Fiva, Ernst Håkon Jahr og Tarald Taraldsen (alle frå UiTø) NAVFs pris for framifrå forsking i 1990. Bull vart kommandør av St. Olavs Orden i 2006.

• Tove Bull i Norsk biografisk leksikon
• språkvitskap
• UiT Norges arktiske universitet
• Noregs Mållag

• Hvem er hvem 1994