Torleiv Stadskleiv var ein norsk målar av romantiske telemarkslandskap og teiknar av portrett og folkelivsbilete. Mange av motiva fann Stadskleiv i Lifjell i Telemark, der han om somrane budde i ei primitiv hytte, «Skrubbehiet».
Torleiv Stadskleiv var fødd i Bø (no Midt-Telemark) i Telemark. Han fekk plass på Den kongelige Tegneskole i Kristiania (no Kunsthøgskolen i Oslo) etter tilråding frå Erik Werenskiold i 1883. Seinare var han elev av Christian Krohg, Erik Werenskiold, Eilif Peterssen og Hans Heyerdahl. I København var han i lære hos kunstnaren Kristian Zahrtmann. Stadskleiv besøkte både Italia, Frankrike og Tyskland, der han sat i musea og kopierte dei store meistrane.
Sommaren 1891 møtte Stadskleiv den 11 år yngre kunstnaren Halfdan Egedius, som han måla saman med i Bø i åra 1892 til 1898. Dette skal ha vore Stadskleiv si beste tid, både kunstnarleg og menneskeleg.
Stadskleiv sine bilete er blitt karakteriserte som naturlyrikk, i pakt med stemningar som rådde i den nyromantiske målarkunsten og poesien i 1890-åra.
Han stilte ut ved Statens Kunstutstilling (Haustutstillinga) i 1886, hadde separatutstillingar i Kunstnerforbundet og stilte ut i kunstforeiningane i både Skien og Tønsberg. Bø museum har 40 bilete av Stadskleiv, og han er representert med to måleri i Nasjonalgalleriet.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.