Faktaboks

Per Anders Buen Garnås
Fødd
11. juni 1980, Bø, Vestfold og Telemark
Per Anders Buen Garnås. Fotograf: Kjell Bitustøyl, gjengitt med tillatelse.
.
Lisens: Avgrensa gjenbruk

Per Anders Buen Garnås er ein norsk hardingfelespelemann frå Bø i Telemark som er oppvaksen i ein av våre mest kjende folkemusikkfamiliar. Det er telemarkstradisjonen Buen Garnås fører vidare, men han har òg tileigna seg slåttar frå Hallingdal, Valdres, Numedal og Hardanger. I 2022 blei han kåra til årets folkemusikar.

Læremeistrar

Buen Garnås er utdanna ved Spelemannsskulen ved Ole Bull Akademiet. Han fatta tidleg interesse for felespel. Fyrste opplæringa fekk han i Bø musikkskule ved Kjell Bitustøyl og Johannes Sundsvalen. Samtidig lærte han av onklane Knut Buen og Hauk Buen. Andre inspirasjonskjelder/læremeistrar har vore Eivind Mo, Einar Løndal og Olav K. Øyaland.

Plateutgjevingar

I 2002 debuterte Buen Garnås med soloplata Åleine. Seinare har han delteke på fleire albumutgjevingar, med gruppa Hått, med spelemannen Daniel Sandén Warg, i samarbeid mora Agnes Buen Garnås og med systera Ingvill Marit Buen Garnås. Med sistnemnde fekk han Folkelarmprisen 2010 i soloklassa for albumet Salme segn og solbøn. Buen Garnås har òg vunne gullplate både for singel og for album saman med folkrockbandet Byting, der han var fast medlem i fleire år. Han har òg samarbeidd med brørne Odd og Aasmund Nordstoga.

I 2022 gav han ut Anno 2001, med 20 år gamle opptak av slåttespel, og Anno 2021, med nye innspelingar, mellom anna av eigne og særeigne slåttekomposisjonar.

Prisar og utmerkingar

Buen Garnås har vore ein ivrig kappleiksdeltakar og har ei rekkje framståande kappleiksprestasjonar bak seg, han har mellom anna vunne Landskappleiken fire gonger mellom 2003 og 2018. Konkurransen Fanitullkåringa har han òg vunne heile fire gonger. Buen Garnås har vore nominert til Spellemannprisen tre gonger. I 2015 vann han Folkelarmprisen åleine i soloklassa, denne gongen med utgjevinga Greinir. Han vann også Gammleng-prisen i klassa for musikarar i 2021, og han ble kåra til årets folkemusikar under Folkelarmprisen 2022. I 2012 blei han tildela toårig arbeidsstipend og i 2021 eittårig arbeidsstipend, begge stipenda frå Norsk Kulturråd.

Konsertar og turnear

Sidan tenåra har musikken vore ein stor del av levebrødet hans gjennom konsertar og turnear i inn- og utland. I 2022 har han turnert med ein konserttriologi om Myllaren, Gibøen og Fykerud, som er bland dei tre største kjeldene for slåttemusikken her i landet på 1800-talet. Her får publikum møte musikaren både som spelemann, formidlar og forteljar. Per Anders Buen Garnås er ein markant tradisjonsbærar med stor formidlingsevne og talegåver, og er i dag ein av våre fremste folkemusikkutøvarar.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg