Faktaboks

Mons Breidvik
Fødd
15. januar 1881, Brekke i Sogn
Død
15. august 1950, Kvam i Hardanger
Bokomslag av Mons Breidvik

Mons Breidvik (bokomslag). Arne Garborg 70 aar. 1921.

Bokomslag av Mons Breidvik
Av /Mats Linder.

Mons Breidvik var ein norsk teiknar, målar og bokkunstnar. Han var mykje omtykt for stødige portrett og kjenslevare teikningar av badande småbarn. Dei største utsmykkingsarbeida utførte Breidvik i USA.

Bakgrunn

Breidvik var fødd i Brekke i Sogn (no Gulen i Vestland) og døydde i Kvam i Hardanger. Som odelsgut sa frå seg garden og søkte kunstnarvegen, inspirert mellom anna av Harriet Backer, men mest av Erik Werenskiold. Han gjekk i lære under både Backer og Werenskiold, i tillegg til kunststudium i Tyskland og Italia.

Kunsten

Breidvik vart ein mykje nytta portrettkunstnar. Velkjend vart han òg for dei yndefulle barnemotiva sine, vidt spreidde i grafisk form. Breidvik var sterkt opptatt av å fremje norskdom i kunst og handverk, klesdrakt, byggeskikk og husbunad. Han illustrerte ei rad bøker og stimulerte kuntnarlege behov hos barn gjennom teikningar i barneblad.

Han debuterte på Haustutstillinga i 1915 og deltok der til saman elleve gonger. Frå 1925 til 1936 var han busett i USA og utsmykka mellom anna skular og kyrkjer. Han er innkjøpt av fleire kunstmuseum, mellom anna Metropolitan Museum of Art i New York og Nasjonalmuseet i Oslo.

Medan han var busett i New York leverte han omfattande kyrkjeprydnad i Grace Episcopal Church og utsmykking i Straubenmuller Textile High School. Breidvik hevda sterkt Vestlandet sin plass i norsk kunstliv og heldt tidleg fram kravet om eit eige vestnorsk kunstakademi som motvekt til akademiet i Oslo. Vestlandets Kunstakademi (no Universitetet i Bergen), vart skipa i 1973.

Breidvik har måla fleire ungdomslagsfaner, blant anna fana til BUL Ervingen frå 1914 (der hakekrossen var måla på baksida, men seinare til- dekka) og fanene til Heggelandsdalen Ul, Sognalaget i Bergen (den gamle) og Hafslo Ul.

Portrett av Nikolai Astrup
Teikning av Mons Breidvik: Portrett av kunstnaren Nikolai Astrup, teikna på Sandalstrand 1921 (litografi 1924).
Av /Nasjonalbiblioteket.

Les meir i Store norske leksikon

Litteratur

  • Idsø, Liv Marit og Asbjørn Thomassen (red.) Faner i den frilynde ungdomsrørsla. Bokbyen forlag 2015.
  • Storaas, Reidar (2.oppl. 2011). Vestlandskunstnaren Mons Breidvik. Selja Forlag.

Faktaboks

Mons Breidvik

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg