Faktaboks

Lisbeth Berg-Hansen
Fødd
14. mars 1963, Bindal, Nordland
Lisbeth Berg-Hansen

Lisbeth Berg-Hansen er tidlegare stortingsrepresentant for Arbeidarpartiet (Ap) frå Nordland og tidlegare fiskeri- og kystminister i regjeringa Stoltenberg II. Ho var statssekretær ved Statsministerens kontor i regjeringa Stoltenberg I og var visepresident i NHO.

Bakgrunn

Lisbeth Berg-Hansen er fødd i Bindal i Nordland. Ho er utdanna tannlegeassistent, men har òg arbeidd som lærer. Ho er mest kjend som fiskeoppdrettar, og dreiv frå 2008 fiskeoppdrett i familiebedrifta SinkaBerg-Hansen AS i Bindal.

Politisk karriere

Berg-Hansen var medlem i Bindal kommunestyre for Arbeidarpartiet i 1988–2007, der ho var varaordførar i 1995–2003. Ho var styremedlem i Nordland Arbeidarparti i 2001–2005. Berg-Hansen var vararepresentant til Stortinget for Nordland i 1997–2001 og i 2009–2013. I perioden 2013 til 2017 var ho innvald som stortingsrepresentant for Arbeidarpartiet frå Nordland.

I 1992–1996 var Berg-Hansen politisk rådgivar i Fiskeridepartementet i regjeringa Brundtland. Ho var statssekretær ved Statsministerens kontor i 2000–2001 i regjeringa Stoltenberg I. I 2009–2013 var ho statsråd ved Fiskeri- og kystdepartementet som fiskeri- og kystminister i regjeringa Stoltenberg II.

Andre verv

Berg-Hansen har mellom anna vore styreleiar i Fiskeri- og havbruksnæringa si landsforeining og styremedlem og nestleiar i Fiskeriforskning i Tromsø (no Nofima). Ho var frå 2002 til 2008 medlem i både arbeidsutvalet og i hovudstyret i NHO, og i 2004–2008 var ho visepresident i NHO. Ho har òg vore styremedlem i Aker Seafoods ASA.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg