Faktaboks

Jan Hus
også Johann Huss, Johannes Huss, John Huss
Fødd
1371, Husinec, Böhmen, Det tysk-romerske riket (no Tsjekkia)
Død
6. juli 1415, Konstanz, Det tysk-romerske riket (no i Tyskland)
Levetidskommentar
omtrentleg fødeår
Jan Hus

Jan Hus på bålet. Samtidig illustrasjon til Jenakodeksen Antithesis Christi et Antichristi.

Jan Hus
Av /※.

Praha. På torget i Prahas gamle bydel står monumentet over Jan Hus.

Lisens: Avgrensa gjenbruk

Jan Hus var ein tsjekkisk teolog og forfattar. Han var ein forløpar og inspirator for reformasjonen, og fekk betydning også utanfor heimlandet Tsjekkia. I heimlandet sitt fekk han stor betydning ved at han brukte og fremja det tsjekkiske språket.

Liv og virke

Hus studerte ved Karls-universitetet i Praha og blei i 1396 magister. Han blei prestevigd i 1400, dekan ved det filosofiske fakultetet i 1401 og rektor ved universitetet i 1402. Han verka som universitetslærar, forfattar av mange skrift og fungerte også som predikant for universitetet. Han skreiv då på latin, som det var vanleg på den tida.

Hus slutta seg til den tsjekkiske reformrørsla og blei i 1402 predikant ved Betlehemskapellet i Praha, som var det første forsamlingshuset i Europa med forkynning utelukkande på folkespråket (tsjekkisk). I 1405 påla erkebiskopen Hus å tale ved dei årlege prestesynodane for å motverke det som blei oppfatta som moralsk oppløysing i kyrkja. Desse preikene skaffa Hus mange fiendar blant presteskapet. I den teologiske debatten om læra til den engelske presten John Wycliffe, som oppstod ved universitetet etter 1401, inntok Hus eit moderat standpunkt blant Wycliffes tilhengjarar. I skriftet De corpore Christi (1406) tok han avstand frå delar av Wycliffes lære.

Jan Hus' mål var å opplyse folket om det han oppfatta som rett kristen livspraksis, betre moral og å motarbeide maktmisbruken til prestane. Han ivra også for at prestane skulle vere av same nasjonalitet som soknebarna sine, og at dei skulle preike og lese frå Bibelen på folkespråket. Han fekk revidert dei tidlegare tsjekkiske bibelomsetjingane, som blei samla i ein einskapleg bibeltekst med ny ortografi med diakritiske teikn. Dessutan skreiv han mellom anna De orthographia bohemica, og dessutan ein liten ABC for barn. Hus innførte tsjekkisk song i kyrkja, og skreiv sjølv nokre salmar og ei rekkje tsjekkiske skrifter og polemikkar. Dette fekk stor utbreiing. I arbeidet sitt hadde han full støtte av Vaclav 4 (konge av Bøhmen og Tyskland), ein del av adelen og borgarskapen.

Polemikk med kyrkja

I 1409 gjorde kongen universitetet i Praha tsjekkisk, og omtrent 1000 tyske lærarar og studentar forlét Praha og slo seg ned i Leipzig. I 1410 blei Hus vald til rektor for det nyorganiserte universitetet. Same år lét erkebiskopen brenne alle avskrifter av Wycliffes verk, bannlyste Wycliffes tilhengjarar og forbaud all preikeverksemd i kapell, mellom anna i Betlehemskapellet. Jan Hus nekta å lystre ordre. Kongen beslagla eigedommane til mange prestar «til vederlag for Wycliffes bøker», fordreiv erkebiskopen, som døydde like etter, og appellerte Hus' sak til kurien i Roma.

I polemikken mot maktmisbruken frå kyrkja si side (mellom anna avlatshandel) støtta Jan Hus seg i stadig sterkare grad til Wycliffe, og den nye erkebiskopen kunngjorde interdikt eller kyrkjeleg straff over Hus og byen Praha så lenge Hus oppheldt seg der. Hus flytta i oktober 1412 til adelege venner på landet, men heldt fram med å preike for folket i det fri.

No skreiv Hus sine største tsjekkiske skrifter, mellom anna Om erkjenninga av den rette vegen til frelse, tileigna kvinnene, og den store tsjekkiske Postillen (1413). Han skreiv òg, på latin, ei avhandling om kyrkja, De ecclesia, som inneheldt Hus' lære. Hus' skrifter blei spreidde i tallause avskrifter, og gjennom både stilen og den forenkla rettskrivinga danna han grunnlaget for eit einskapleg tsjekkisk skriftspråk. Mykje av det han skreiv, er framleis levande litteratur, særleg breva. På latin blei dei første gong gitt ut av Martin Luther i 1536. Ei kritisk utgåve av samla skrifter i 25 bind blei gitt ut av Bartoš og Ryba i Praha frå 1959.

kong Václav 4 i 1411 avstod rettane sine til den tyske keisarkrona til bror sin, Sigismund, oppmoda Sigismund Jan Hus til å leggje fram saka si for konsilet i Konstanz. Keisaren gav Hus eit leidebrev som sikra han fri reise til og frå og personleg fridom under opphaldet. I Konstanz skreiv Hus mellom anna ei fråsegn om lekfolk sin rett til nattverden i form av brød og vin (lekmannskalken), som nokre av tilhengjarane hans byrja å dele ut i Praha. Hus fann ingen grunn for å forby dette. Han blei vennleg motteken av pave Johannes 23, som likevel sjølv blei avsett av konsilet.

Endelykt og ettermæle

I november 1414 blei Hus arrestert og kasta i fengsel, der han blei alvorleg sjuk. Han blei hardt forhøyrd, men han nekta å kalle tilbake det han hadde skrive og talt, og viste til løftet om offentleg audiens ved konsilet. Frå fengselet skreiv han brev til venner og til kyrkjelyden sin ved Betlehemskapellet.

Etter kraftige protestar mot fengslinga av Hus i Böhmen, hos kongen og adelen (også polsk adel), måtte keisar Sigismund gripe inn, og Hus fekk lov til å forsvare seg ved konsilet i nærværet til keisaren. Då Hus ikkje ville kalle tilbake det han hadde lært, utan at det blei bevist noka vranglære hos han, blei han høgtideleg erklært for kjettar, bannlyst og overgitt til «den verdslege armen», det vil seie keisaren. Han blei brend på bål ved breidda av Rhinen 6. juli 1415, fast overtydd om at sanninga ville sigre til slutt, ord som blei slagordet til husittane og som i 1918 blei sett på banneret til den tsjekkoslovakiske presidenten.

Dei moraviske brørne (herrnhutarar) eller brødrevennene har røtene sine blant tilhengjarane av Jan Hus.

Les meir i Store norske leksikon

Kommentarar (1)

skreiv Bjørnulf Aasen

Lenken fra remanenslære i tredje avsnitt fører til begrepet remanens innen elektromagnetisme.

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg