Ivar Formo

Ivar Formo var ein norsk skiløpar og orienteringsløpar. Han blei olympisk meister på 50 km i Innsbruck i 1976, tok OL-bronse på 15 km i 1972. I stafett vann han OL-sølv i 1972 og 1976 og VM-bronse i 1974 og 1978. Formo vann den første (uoffisielle) verdscupen i langrenn sesongen 1973/1974, og tok tredjeplass i 1975/1976.

I alt vann Formo seks NM i perioden 1973–1976, derav fire på 30 km, eitt på 50 km og eitt på 15 km. Han fekk kongepokal i 1975. I Holmenkollen tok han fem andreplassar som senior i perioden 1972–1977. Han vann 30 km i Svenska Skidspelen i 1976 og 15 km i Lahtisspelen i 1973, Birkebeinerrennet i 1975. Som junior blei han europameister på 10 km i 1971 og i stafett i 1970.

I orientering vann Formo bronse i stafett i VM i 1974, uoffisielt NM-gull i nattorientering i 1977, og dessutan NM-sølv og NM-bronse i ordinær løype.

Klubb: Ski- og Fotballklubben Lyn, Oslo.

Formo blei tildelt Egebergs ærespris i 1973, Holmenkollmedaljen i 1975 og Morgenbladets gullmedalje og Sportsjournalistenes statuett i 1976. Formo var leiar av langrennskomiteen i Det internasjonale skiforbundet (FIS) i 1983–1986. Han omkom i julehelga 2006 då han gjekk gjennom isen og drukna under ein treningstur i Nordmarka.