Ingebjørg Bratland

Folkesongen fekk ho med seg frå Vest-Telemark frå ho var fem år. Ellen Nordstoga var den viktigaste læremeisteren i oppveksten. Slektningen Sondre Bratland med sin unike songtradisjon og visesongaren Odd Nordstoga har òg vore viktige inspiratorar. Med fem landskappleiksigrar i yngste klasse vokal folkemusikk på Landskappleiken er Ingebjørg Bratland det næraste du kjem eit vedunderbarn i norsk folkemusikk.

Ho song i 2006 tittelsporet på Odd Nordstoga sin barneserie for NRK P1 Jul i svingen. Og i 2007 gjorde ho seg bemerka då ho song for Kong Harald i samband med 70-årsdagen hans. Bratland vann A-klassa i vokal folkemusikk på Landskappleiken fyrste gong ho deltok i seniorklassa, det vil seie i 2009. Same år blei ho nordisk meister i folkemusikk under arrangementet NORD i Sälen.

Bratland er ikkje berre oppteken av folkemusikk, ho har òg interessert seg for andre songarar, til dømes Joni Mitchell, og ho har samarbeidd med ei rad artistar frå ulike sjangrar. I 2008 blei Bratland plukka ut av HKH Kronprinsesse Mette-Marit til samleplata Sorgen og gleden med 11 norske utøvarar. Under Landskappleiken 2010 vann ho Fureprisen, ein pris på 50 000 kroner til unge utøvarar.

I 2013 debuterte Bratland med plata Heimafrå i lag med Odd Nordstoga. Plata selde til gullplate (20 000) og vann Spellemannprisen i klassa for folkemusikk/tradisjonsmusikk. Duoen heldt over 100 konsertar i løpet av året landet rundt, stort sett for fulle hus.

Første soloplate kom i 2014, Berre meg, ei plate meir i pop/visesjangeren, produsert av Bjørn Nessjø. Låten Ingen e som du blei A-lista på NRK P1, og plata blei nominert til Spellemannprisen i viseklassa.

Hausten 2015 kom oppfølgjaren Månesinn, framleis i pop/vise-sjangeren, men denne gong i hovudsak med eige materiale. Unntaket er ein norsk versjon av Bob Dylans sin berømte kjærleikssong Make you feel my love, som fekk tittelen Fordi eg elskar deg i norsk språkdrakt, omsett av Bjarte Hjelmeland. Dette blei ein stor radiohit hausten 2015. Albumet toppa mange hitlister i ein periode, høgste plassering på VG-lista var nr. 2. Plata selde over 40 000 eksemplar, og lanseringsturneen blei ein stor suksess med utselde konsertar overalt.

Våren 2016 blei Bratland tildelt Telemark fylkes kulturpris for 2015. I 2016 gjennomførte ho ein turné med over 70 konsertar, på festivalar og i konserthus, utseld overalt.

Hausten 2017 kom det tredje soloalbummet Hjarteskjell, langt på veg i same sjangeren som den førre plata. Flesteparten av låtane er laga av Bratland, nokon er skrivne i samarbeid med produsentane. To låtar er oversett til norsk av Bratland. Fire forskjellige produsentar, Martin Sjølie, Kåre Vestrheim, Lars Horntvedt og Espen Lind/Geir Hvidsten, og fire ulike studio har vore involvert i produksjonen. Bratlands eigen låt, singelen Bror, blei A-lista på NRK P1 hausten 2017.

Bratland blei hausten 2017 tildelt Hilmar Alexandersen musikkpris, ein pris som har vore delt ut sidan 1991. I november 2017 fylte Ingebjørg Bratland Oslo Spektrum, den største konserten i karrieren så langt.

• Heimafrå, med Odd Nordstoga (2013)
• Berre meg (2014)
• Månesinn (2015)
• Hjarteskjell (2017)
• Papirfly (2020)

• kveding
• visesong
• folkemusikk
• populærmusikk

• Ingebjørg Bratlands egen nettside