Bård Hoksrud

Hoksrud fullførte treårig vidaregåande opplæring i handel og kontorfag i 1992. Samstundes arbeidde han som butikkmedarbeidar. Frå 1994 til 1998 arbeidde han som assisterande butikksjef og butikksjef i daglegvarehandelen.

Hoksrud var medlem av kommunestyret i Bamble 1991–2011. Han var medlem av landsstyret i KS (Kommunenes sentralforbund) frå 2000 til 2005.

Frå 1998 vart han heiltidspolitikar, først som organisasjonssekretær i Framstegspartiet og frå 2001 som politisk rådgivar. Han var formann i Framstegspartiets Ungdom 1999–2002 og distriktssekretær for Buskerud, Telemark og Vestfold 2002–2005.

Hoksrud vart innvald på Stortinget frå Telemark i 2005. Mesteparten av tida har han vore medlem av transport- og kommunikasjonskomiteen, der han er nestleiar 2020–2021.

Hoksrud har markert seg imot det han kallar unødvendige forbod og reguleringar. Han har talt for å tillate lakrispiper, ståhjuling, vasskuter og sal av sjokolademjølk og anna søtt i skulekantiner. Han har òg vore rekna som ein folkeleg og frittalande politikar, anten han har uttalt seg om bompengar eller eldreomsorg.

I Framstegspartiet har han vore ein sentral politisk strateg i tida etter 2000. Han var tett på Carl I. Hagen som FpU-formann og rådgivar, og han heldt på denne posisjonen etter at Siv Jensen blei ny formann i 2006. Hoksrud er på mange måtar rekna som ein brubyggjar mellom dei tradisjonalistiske og dei liberalistiske fløyene i partiet.

• Solberg-regjeringa
• Framstegspartiet
• Stortingsrepresentantene 2021–2025