Arne Falk

Arne Falk var fødd i Herøy i Nordland og døydde i Oslo. Han gjekk amtsskulen for Helgeland i 1901–1902 og hadde ymse arbeid før han i 1912 vart kontorsjef i Den 17de Mai.

Frå 1918 var han journalist i Den 17de Mai, og i 1927–1935 var han redaksjonssekretær. I tillegg var han redaktør for Norsk Barneblad i 1916–1918, og i 1921–1932 som redaktør i det nynorske familiebladet For Bygd og By. Frå 1935 var Falk redaksjonssekretær i Norsk Tidend, i 1937–1946 som redaktør. Etter andre verdskrigen, frå 1946 til 1962, redigerte han fagbladet Journalisten. Og frå 1964 hadde han si eiga spalte i Dag og Tid, «Frifant-epistlar».

Han hadde ei rad tillitsverv i presseorganisasjonar. Alt i 1919 vart han styremedlem i Oslo Journalistklubb, der han var sekretær i 1933–1958. Han var medlem av hovudstyret i Norsk Presseforbund i 1939–1941, varamedlem i ni år og i 1945–1947 medlem av det faglege utvalet.

Under andre verdskrigen var Falk aktiv i det illegale arbeidet og var mellom anna kontaktpunkt mellom presseorganisasjonane og regjeringa. Han var sekretær i gruppa som før frigjeringa førebudde overgangen til ei fri presse.

I 1945 vart han tildelt Norsk Presseforbunds heidersteikn og i 1958 vald til æresmedlem. Han vart slått til riddar av Oslo Journalistklubbs orden Blækspruten i 1946 og fekk i 1965 prisen frå Riksfondet for nynorsk presse for godt journalistisk arbeid. I 1970 fekk han Melsomprisen.

• norsk presses historie
• journalistikk
• Den 17de Mai
• Norsk Tidend

• Olaf Almenningen ofl. (red.): Målreising i 75 år. Noregs Mållag 1906–1981. Oslo 1981
• Rolv Werner Erichsen: For ytringsfrihet under ansvar. Norsk Presseforbund 1910–1935–1960. Bergen 1960
• Arne Falk: Frifant-epistlar. Oslo 1969
• Ottar Grepstad: Avisene som utvida Noreg. Oslo 2010
• Guri Hjeltnes: Avisoppgjøret etter 1945. Oslo 1990
• Aage Møst (red.): Oslo Journalistklubb 100 år. 1894–1994. Oslo 1994
• Norskt Bladmannalag gjenom 10 aar – 1913–1923. Bjørgvin 1923
• Rune Ottosen: Fra fjærpenn til Internett. Oslo 1996